《但願從此只有重光派》

작년

大家好,我係俗稱攬炒巴嘅「我要攬炒」,對上一次公開錄音已經係816 遮打集會。聽講最近有人加碼到一百萬想殺我,令我認真開始諗緊遺書應該點寫。

2019年,係第一次有數以百萬計香港人以血、汗、生計、前途、性命作為籌碼同強權搏鬥,同極權攬炒。大學校園受盡炮彈圍攻,而犧牲、被殺、流亡嘅義士不計其數。

但係,我地成功擋住送中;我地重新發掘梁天琦留低嘅「光復香港,時代革命」口號;我地創造出民族之歌《願榮光歸香港》;我地同國際結盟;我地光復區議會。

經過2014、16年洗禮,唔同陣營終於喺2019年學識收儉,可惜最近又走回頭路。黃店、本土、泛民又開始埋首於內鬥。

【論泛民】

係,反送中初期,個別泛民因爲危機感開始進步,反省過去割本土派、割勇武嘅行為。但絕大多數依然固步自封。40年黎,錯信共產黨,毫無執政意志可言,聲稱法治有險可守,再唔係就怕做主席、話有正職要忙唔開會、投錯票。

最近有泛民見到DQ危機同大搜捕之後想走回頭路,內部提議同勇武割席自保,甚至有人腳軟想同中聯辦叩頭換命。

唇亡齒寒。

過去30年,仲未讓步讓得夠?選你出黎係同中共投降?連承諾攬炒所有政府議案,直至滿足五大訴求都唔敢,又唔初選協調,點說服人衝35+?

我無興趣私怨上身同泛民數到天光。但底線係,任何泛民無必死決心破局嘅話,就必須退位讓賢。

而且,我地香港人唔係要守住法治條屍;要重光香港,就要從零開始,重新建構代表香港嘅法治。美國之所以成為美國,源於200年前,一班睇穿北美法治已死嘅律師同人民;佢地唔單止有勇氣承認畢生所學已死,更有計謀喺北美洲、國際之間同日不落帝國周旋。

【論本土】

咁本土派呢?

部分本土派繼續自以為是,一口咬定只有自己嗰套可行,用惡劣態度批鬥、嘲笑全世界,笑人送頭。開口埋口就黃屍、黃衛兵、連衛兵;咁同標籤人熱狗有咩分別?再唔係,就將自己塑造成「被熱狗苦主」,搶佔道德高地做擋箭牌。

2016年之後本土派之所以一厥不振,除咗暴政DQ、泛民隔壁觀火,就係因為一堆人初步覺醒完,就自視過高。人貴自知,根本無人有能力判斷自己條路必然正確。任你智商再高又如何?俾人打壓過就大晒呀?

一直以黎,本土派最缺乏嘅,就係海納百川嘅氣魄同領導能力。只識埋怨民智未開、數私怨,空有執政意志,而無帶領民族覺醒出紅海嘅氣魄胸襟。要光復香港,本土派最無本錢沉迷路線之爭,圍爐自滅。

歷史係一個循環。環顧世界歷史,我都睇唔到有幾多因爲杯葛不義選舉而導致抗爭成功嘅例子。戰略上,進軍立法會唔係為獎金。只要雞蛋一方識得運用,選舉帶黎嘅認受性、國際光環就係破局工具。

無同敵人攬炒嘅決心、一心想保住議員身份而唔破局嘅人通通都係「投降派」。只尊一線,日日冷嘲熱諷,指責其他人係共諜、黃屍傻粉、送頭嘅人通通都係「犬儒派」。

本土嗰邊唔諗點善用,泛民嗰邊又唔敢去善用。膠,從來都不分左右。

今時今日,香港人面對嘅敵人比蘇聯更強大,重光路上,街頭、議會、國際三線缺一不可。

無街頭抗爭、國際支援,「議會」毫無還擊之力;無國際支援、議會攬炒,「街頭肉身擋子彈」都係徒勞無功;無民選議員光環、街頭施壓,「國際遊說」尤如逆水行舟。

【論攻守】

2019年我地尚且靠和勇合一、攬炒擋住送中。但係不斷打守勢波,我地擋得幾多次?與其消極防守,香港人更應該以創意、決心主動破局。依個世界,唔係得共產黨先識得「以攻代守」。

舉個例,我地區議會大勝完,除咗笑一兩次PK鄧,大叫政府削弱區議會可恥之外,有無嘗試擺脫對手棋局?除咗劍指35+,點解我地唔利用公帑搞嘅不義選舉,建立屬於香港人嘅「上下、參眾議院」分庭抗禮?

一方面,我地有400個民選區議員,另一方面所有瑞典城市居然,同中国解除「姊妹城市」關係。依個正正係香港議會、國際線互相合作,以攻代守,顯示Hong Kong is NOT China嘅良機。

我懇請 全體區議員 分區動議,聯合授權民間團體,例如攬炒團隊(Fight for Freedom. Stand with Hong Kong.),以民間外交方式為香港爭取《姊妹城市協議》,為國際反擊鋪路。我,攬炒本人,願意冒疫情同人身安全風險親身到北歐爭取國際協議,為香港破局重光盡力。縱使武肺肆虐,攬炒團隊北美、英國、北歐分隊依然隨時待命。

依個由區議員組成,真正屬於香港人嘅「下議院」可以授權全球唔同民間團體、黨派以「準香港代表」身分,同世界各國遊說溝通,再由區議會簽署協議。當遊說個別議題成功,例如美國制裁、成功建立姊妹城市,單次授權效力就會終止;同一議題上,可以同時授權唔同黨派各自爬山,防止獨大墜落。

中期而言,香港人可以考慮成立基金,為真正屬於香港人嘅上議院、下議院、以至被DQ議員提供資金,擺脫DQ打壓。

長遠而言,我地甚至可以運用資金自己選舉自己搞,自己議院自己選,全力破局重光。

不論區議會、立法會,當選嘅人你背負嘅係民意,係一個對國際社會有話語權、有份量嘅身份。要光復香港,就唔可以怕事,唔可以因循守舊。即使被DQ,你嘅一言一行依然有份量。

香港人,係時候喺議會、街頭、國際三線以攻代守。

最後,最近政府同中聯辦開口埋口都講「攬炒」,將政府施政失敗嘅責任推俾香港人。我必須重申一次,攬炒,係中共剝奪我地香港人生計、自由、文化、民主,迫弱勢一方到絕路而誕生嘅反攻手段。

攬炒,唔係Burnism,係 Phoenixism,係鳳凰重生 嘅必經過程。香港人,再無同中共妥協嘅空間。

但願從此人人覺醒,再無大眾、本土、泛民之分。

但願我地告別犬儒,告別投降,告別內鬥,從此只有重光派,為煲底之約奮戰。

寧化飛灰,不作浮塵。
If we burn, you burn with us.

Source:Fight for freedom, stand with Hong Kong

Authors get paid when people like you upvote their post.
If you enjoyed what you read here, create your account today and start earning FREE STEEM!
STEEMKR.COM IS SPONSORED BY
ADVERTISEMENT
Sort Order:  trending

Hi! Did you know that steemit.com is now censoring users and posts based on their opinions?
All the posts of these users are gone!
https://github.com/steemit/condenser/commit/3394af78127bdd8d037c2d49983b7b9491397296

Here's a list of some banned users:
'roelandp', 'blocktrades', 'anyx', 'ausbitbank', 'gtg', 'themarkymark', 'lukestokes.mhth', 'netuoso', 'innerhive'
See anyone you recognize? There could be more, they also have a remote IP ban list.

Will you be censored next?