Saleum peumeuah beryoek that dari kamoe yang penuh dosa

2년 전

image
Ranub bineh gle, meuputie karang.
Ranub bineh blang, meuputie tangke.
Dengan karena, karab trok Ramadhan.
Meuah lon tuan, ngon puteh hate.

Mungken lam haba, serta lam karang.
Kadang komentar, kateupeh hate.
Lon lakei meuah, bak abang abang.
Seureuta cut intan, rakan lam FB.

Meupat nasalah, tulong maafkan.
Ngon karna Tuhan, meuah neulahe.
Bekle na saket, hate di dalam.
Tulong maafkan, baten ngon lahe.

Miseu nibak lon, katreb lon siram.
Hana le dendam, di dalam hate.
Kagleh ban mandum, dosa di rakan.
Kalon maafkan, ngon puteh hate.

Teuma lon tanyong, kanibak rakan.
Meupue lon tuan, meuah ka neubre ?
Miseu ka neubre, meuah neulayang.
Harap balasan, Allah peusampe.

Allah sep seunang, ria hana ban.
Bila nyan dendam, tan na lam hate.
Ka terhapus bandum, ubena kesalahan.
Puteh lom teuman, ka gleh brok fi'e.

Dengan beureukat, buleun Ramadhan.
Buleun yang terang, fahla dum sampe.
Maka neusambot, ngon hate lapang.
Serta lam badan, beungeh bekna le.

Neupinah beujioh, sifeut meudendam.
Neupeupoe lam blang, bah tikoh reule.
Jinoe neusambot, buleun Ramadhan.
Teukeudi Tuhan, Rahmat keu hase.

Meuah lon sampai, dalam tulisan.
Keurakan sayang, hantrok lon sampe.
Semoga teuhah, neubri balasan.
Ngon hate lapang, dosa bekna le.

Kasep eh noe, haba lon karang.
Kata maafan, lewat sastra ca'e.
Salam'alaikom, akhe lam kalam.
Semoga kedepan tanyo jroh sabe.

Authors get paid when people like you upvote their post.
If you enjoyed what you read here, create your account today and start earning FREE STEEM!
STEEMKR.COM IS SPONSORED BY
ADVERTISEMENT